|
1. ahurahe mazdå
raêvatô hvarenanguhatô ameshanãm speñtanãm.
2. vanghave mananghe âxshtôish hãm-vaiñtyå taredhâtô anyâish
dâmãn âsnahe xrathwô mazdadhâtahe gaoshô-srûtahe xrathwô mazdadhâtahe.
3. ashahe vahishtahe sraêshtahe airyamanô ishyehe sûrahe
mazdadhâtahe saokayå vanghuyå vouru-dôithrayå mazdadhâtayå ashaonyå.
4. xshathrahe vairyehe ayôxshustahe marezhdikâi thrâyô-drikhaove.
5. speñtayå vanghuyå ârmatôish râtayå vanghuyå vouru-dôithrayå
mazdadhâtayå ashaonyå.
6. haurvatâtô rathwô ýâiryayåsca hushitôish saredhaêibyô ashahe
ratubyô.
7. ameretatâtô rathwô fshaonibya vãthwâbya aspinibya ýaonibya
gaokerenahe sûrahe mazdadhâtahe,
(hâwan gâh:)
mithrahe vouru-gaoyaoitôish râmanasca hvâstrahe,
(rapithwin gâh:)
ashahe vahishtahe âthrasca ahurahe mazdå,
(uzîrin gâh:)
berezatô ahurahe nafedhrô apãm apasca mazdadhâtayå,
(aiwisrûthrim gâh:)
ashâunãm fravashinãm khenãnãmca vîrô-vãthwanãm ýâiryayåsca hushitôish
amaheca hutâshtahe huraodhahe verethrakhnaheca ahuradhâtahe vanaiñtyåsca
uparatâtô,
(ushahin gâh:)
sraoshahe ashyehe ashivatô verethrâjanô frâdat-gaêthahe rashnaosh
razishtahe arshtâtasca frâdat-gaêthayå varedat- gaêthayå.
8. dathushô ahurahe mazdå raêvatô hvarenanguhatô ameshanãm
speñtanãm.
9. âthrô ahurahe mazdå puthra hvarenanghô savanghô mazdadhâtahe
airyanãm hvarenô mazdadhâtanãm kâvayeheca hvarenanghô mazdadhâtahe,
âthrô ahurahe mazdå puthra kavôish haosravanghahe varôish haosravanghahe
asnvañtahe garôish mazdadhâtahe caêcastahe varôish mazdadhâtahe
kâvayeheca hvarenanghô mazdadhâtahe, âthrô ahurahe mazdå puthra
raêvañtahe garôish mazdadhâtahe kâvayeheca hvarenanghô mazdadhâtahe,
âthrô ahurahe mazdå puthra âtarsh speñta rathaêshtâra ýazata
pouru-hvarenangha ýazata pouru-baêshaza, âthrô ahurahe mazdå puthra mat
vîspaêibyô âterebyô xshathrô-nafedhrô nairyô-sanghahe ýazatahe.
10. apãm vanguhînãm mazdadhâtanãm areduyå âpô anâhitayå ashaonyå
vîspanãmca apãm mazdadhâtanãm vîspanãmca urvaranãm mazdadhâtanãm.
11. hvarexshaêtahe ameshahe raêvahe aurvat-aspahe.
12. månghahe gaocithrahe gêushca aêvô-dâtayå gêushca
pouru-saredhayå.
13. tishtrehe stârô raêvatô hvarenanguhatô satavaêsahe frâpahe
sûrahe mazdadhâtahe stârãm afshcithranãm zemascithranãm urvarô-cithranãm
mazdadhâtanãm vanañtô stârô mazdadhâtahe aoe stârô ýôi haptôiriñga
mazdadhâta hvarenanghuñta baêshazya.
14. gêush tashne gêush urune drvâspayå sûrayå mazdadhâtayå
ashaonyå.
15. dathushô ahurahe mazdå raêvatô hvarenanguhatô ameshanãm
speñtanãm.
16. mithrahe vouru-gaoyaoitôish hazangrô-gaoshahe
baêvare-cashmanô aoxtô-nâmanô ýazatahe râmanô hvâstrahe.
17. sraoshahe ashyehe taxmahe tanu-mãthrahe darshi-draosh
âhûiryehe.
18. rashnaosh razishtahe arshtâtasca frâdat- gaêthayå
varedat-gaêthayå erezhuxdhahe vacanghô ýat frâdat-gaêthahe.
19. ashâunãm fravashinãm ukhranãm ukhranãm aiwithûranãm.
20. amahe hutâshtahe huraodhahe verethrakhnahe ahuradhâtahe
vanaiñtyåsca uparatâtô.
21. râmanô hvâstrahe vayaosh uparô-kairyehe taredhâtô anyâish
dâmãn aêtat tê vayô ýat tê asti speñtô-mainyaom, thwâshahe hvadhâtahe
zrvânahe akaranahe zrvânahe darekhô-hvadhâtahe.
22. vâtahe hudhånghahe adharahe uparahe fratarahe pascãithyehe
nairyayå hãm-varetôish.
23. dathushô ahurahe mazdå raêvatô hvarenanguhatô ameshanãm
speñtanãm.
24. razishtayå cistayå mazdadhâtayå ashaonyå daênayå vanghuyå
mâzdayasnôish.
25. ashôish vanghuyå cistôish vanghuyå erethê vanghuyå rasãstâtô
vanghuyå hvarenanghô savanghô mazdadhâtahe pâreñdyå raorathayå airyanãm
hvarenô mazdadhâtanãm kâvayeheca hvarenanghô mazdadhâtahe ahvaretaheca
hvarenanghô mazdadhâtahe zarathushtraheca hvarenanghô mazdadhâtahe.
26. arshtâtô frâdat-gaêthahe garôish ushi-darenahe mazdadhâtahe
asha-hvâthrahe.
27. ashnô berezatô sûrahe vahishtahe anghêush ashaonãm raocanghô
vîspô-hvâthrô.
28. zemô hudhånghô ýazatahe imå aså imå shôithrå garôish
ushi-darenahe mazdadhâtahe asha-hvâthrahe vîspaêshãmca gairinãm
asha-hvâthranãm pouru-hvâthranãm mazdadhâtanãm kâvayeheca hvarenanghô
mazdadhâtahe ahvaretaheca hvarenanghô mazdadhâtahe.
29. mãthrahe speñtahe ashaonô verezyanghahe dâtahe vîdaêvahe
dâtahe zarathushtrôish darekhayå upayanayå daênayå vanghuyå
mâzdayasnôish zarazdâtôish mãthrahe speñtahe ushi-darethrem daênayå
mâzdayasnôish vaêdhîm mãthrahe speñtahe âsnahe xrathwô mazdadhâtahe
gaoshô-srûtahe xrathwô mazdadhâtahe.
30. anakhranãm raocanghãm hvadhâtanãm raoxshnahe garô-nmânahe
misvânahe gâtvahe hvadhâtahe cinvat-peretûm mazdadhâtãm, berezatô
ahurahe nafedhrô apãm aspasca mazdadhâtayå haomahe ashavazanghô dahmayå
vanghuyå âfritôish ukhrâi dâmôish upamanâi, vîspaêshãm ýazatanãm
ashaonãm mainyavanãm gaêthyanãm ashâunãm fravashinãm ukhranãm
aiwithûranãm paoiryô-tkaêshanãm fravashinãm nabânazdishtanãm fravashinãm
aoxtô-nâmanô ýazatahe!!
|
