+ AVESTA

-	Yasna
-	Khordeh Avesta
-	Visperad
-	Vendidad
-	Fragments

- 101 NAMES

- ANGELS

- CALENDAR

Chapter 12. [The Zoroastrian Creed]

(zôt,)

1. nâismî daêvô, fravarânê mazdayasnô zarathushtrish vîdaêvô ahura-tkaêshô staotâ ameshanãm speñtanãm ýashtâ ameshanãm speñtanãm, ahurâi mazdâi vanghavê vohumaitê vîspâ vohû cinahmî ashâunê raêvaitê hvarenanguhaitê ýâ-zî cîcâ vahishtâ ýenghê gâush ýenghê ashem ýenghê raocå ýenghê raocêbîsh rôithwen hvâthrâ.

2. speñtãm ârmaitîm vanguhîm verenê, hâ-môi astû, us gêush stuyê tâyâatcâ hazanghatcâ, us mazdayasnanãm vîsãm zyânayaêcâ vîvâpatcâ.

3. ferâ manyaêibyô rånghê vasê- ýâitîm vasê-sheitîm ýâish upairî âya-zemâ gaobîsh shyeñtî, nemanghâ ashâi uzdâtå paitî avat stuyê, nôit ahmât âzyånîm nôit vîvâpem xshtâ mâzdayasnîsh aoi vîsô nôit astô nôit ushtânahê cinmânî.

4. vî daêvâish akhâish avanghûsh anaretâish akô-dâbîsh sarem mruyê hâtãm draojishtâish hâtãm paoshishtâish hâtãm avanghutemâish vî daêvâish vî daêvavatbîsh vî ýâtush vî ýâtumatbîsh vî kahyâcît hâtãm âtarâish vî manêbîsh vî vacêbîsh vî shyaothanâish vî cithrâish, vî zî anâ sarem mruyê ýathanâ dregvâtâ rãxshayañtâ.

5. athâ athâ côit ahurô mazdå zarathushtrem adhaxshayaêtâ vîspaêshû ferashnaêshû vîspaêshû hañjamanaêshû ýâish aperesaêtem mazdåscâ zarathushtrascâ,

6. athâ athâ côit zarathushtrô daêvâish sarem vyâmrvîtâ vîspaêshû ferashnaêshû vîspaêshû hañjamanaêshû ýâish aperesaêtem mazdåscâ zarathushtrascâ, athâ azêmcît ýô mazdayasnô zarathushtrish daêvâish sarem vîmruyê ýathâ anâish vyâmrvîtâ ýê ashavâ zarathushtrô.

7. ýâ-varanâ âpô ýâ- varanâ urvarå ýâ-varanâ gâush hudå ýâvaranô ahurô mazdå ýê gãm dadâ ýê narem ashavanem ýâvaranô as zarathushtrô ýâvaranô kavâ vîshtâspô ýâvaranâ ferashaoshtrâ jâmâspâ ýâvaranô kascît saoshyañtãm haithyâvarezãm ashâunãm tâ varenâcâ tkaêshâcâ (râspî,) mazdayasnô ahmî!

8. mazdayasnô zarathushtrish fravarânê âstûtascâ fravaretascâ, âstuyê humatem manô âstuyê hûxtem vacô âstuyê hvarshtem shyaothanem.

9. âstuyê daênãm mâzdayasnîm fraspâyaoxedhrãm nidhâsnaithishem hvaêtvadathãm ashaonîm ýâ hâitinãmcâ bûshyeiñtinãmcâ mazishtâcâ vahishtâcâ sraêshtâcâ ýâ âhûirish zarathushtrish, ahurâi mazdâi vîspâ vohû cinahmî. aêshâ astî daênayå mâzdayasnôish âstûitish!!