+ AVESTA

-	Yasna
-	Khordeh Avesta
-	Visperad
-	Vendidad
-	Fragments

- 101 NAMES

- ANGELS

- CALENDAR

Chapter 46. [Ushtavaiti Gatha]

(zôt,)

1. kâm nemôi zãm kuthrâ nemôi ayenî pairî hvaêtêush airyamanascâ dadaitî nôit mâ xshnâush ýâ verezênâ hêcâ naêdâ dah'yêush ýôi sâstârô dregvañtô kathâ thwâ mazdâ xshnaoshâi ahurâ.

2. vaêdâ tat ýâ ahmî mazdâ anaêshô mâ kamnafshvâ hyatcâ kamnânâ ahmî gerezôi tôi â-ît avaênâ ahurâ rafedhrêm cagvå hyat fryô fryâi daidît dà âxsô vanghêush ashâ îshtîm mananghô.

3. kadâ mazdâ ýôi uxshânô asnãm anghêush darethrâi frô ashahyâ frâreñtê verezdâish sêñghâish saoshyañtãm xratavô kaêibyô ûthâi vohû jimat mananghâ maibyô thwâ sãstrâi verenê ahurâ.

4. at têñg dregvå ýêñg ashahyâ vazhdrêñg pât gå frôretôish shôithrahyâ vâ dah'yêush vâ duzhazôbå hãs hvâish shyaothanâish ahêmustô ýastêm xshathrât mazdâ môithat jyâtêush vâ hvô têñg frô-gå pathmêñg hucistôish carât.

5. ýê vâ xshayãs adãs drîtâ ayañtem urvâtôish vâ huzêñtush mithrôibyô vâ rashnâ jvãs ýê ashavâ dregvañtem vîcirô hãs tat frô hvaêtavê mruyât uzûithyôi îm mazdâ xrûnyât ahurâ.

6. at ýastêm nôit nâ isemnô âyât drûjô hvô dâmãn haêthahyâ gât hvô zî dregvå ýê dregvâitê vahishtô hvô ashavâ ýahmâi ashavâ fryô hyat daênå paouruyå då ahurâ.

7. kêm-nâ mazdâ mavaitê pâyûm dadât hyat mâ dregvå dîdareshatâ aênanghê anyêm thwahmât âthrascâ mananghascâ ýayå shyaothanâish ashem thraoshtâ ahurâ tãm môi dãstvãm daênayâi frâvaocâ.

8. ýê vâ môi ýå gaêthå dazdê aênanghê nôit ahyâ-mâ âthrish shyaothanâish frôsyât paityaoget tâ ahmâi jasôit dvaêshanghâ tanvêm â ýâ îm hujyâtôish pâyât nôit duzhjyâtôish kâcît mazdâ dvaêshanghâ.

9. kê hvô ýê-mâ aredrô côithat pouruyô ýathâ thwâ zevîshtîm uzemôhî dà shyaothanôi speñtem ahurem ashavanem ýâ-tôi ashâ ýâ ashâi gêush tashâ mraot isheñtî mâ tâ tôi vohû mananghâ.

10. ýê vâ môi nâ genâ vâ mazdâ ahurâ dâyât anghêush ýâ-tû vôistâ vahishtâ ashîm ashâi vohû xshathrem mananghâ ýãscâ haxshâi xshmâvatãm vahmâi â frô-tâish vîspâish cinvatô frafrâ peretûm.

11. xshathrâish ýûjên karapanô kâvayascâ akâish shyaothanâish ahûm mereñgeidyâi mashîm ýêñg hvê urvâ hvaêcâ xraodat daênâ hyat aibî-gemen ýathrâ cinvatô peretush ýavôi vîspâi drûjô demânâi astayô.

12. hyat us ashâ naptyaêshû nafshucâ tûrahyâ uzjên fryânahyâ aojyaêshû ârmatôish gaêthå frâdô thwaxshanghâ at îsh vohû hêm aibî-môist mananghâ aêibyô rafedhrâi mazdå sastê ahurô.

13. ýê spitâmem zarathushtrem râdanghâ maretaêshû xshnâush hvô-nâ ferasrûidyâi eredhwô at hôi mazdå ahûm dadât ahurô ahmâi gaêthå vohû frâdat mananghâ têm vê ashâ mêhmaidî hushhaxâim.

14. zarathushtrâ kastê ashavâ urvathô mazôi magâi kê vâ ferasrûidyâi vashtî at hvô kavâ vîshtâspô ýâhî ýêñgstû mazdâ hademôi minash ahurâ têñg zbayâ vanghêush uxdhâish mananghô.

15. haêcat-aspâ vaxshyâ vê spitamånghô hyat dâthêñg vîcayathâ adâthãscâ tâish ýûsh shyaothanâish ashem xshmaibyâ daduyê ýâish dâtâish paouruyâish ahurahyâ.

16. ferashaoshtrâ athrâ-tû aredrâish idî dà hvô-gvâ tâish ýêñg usvahî ushtâ-stôi ýathrâ ashâ hacaitê ârmaitish ýathrâ vanghêush mananghô îshtâ xshathrem ýathrâ mazdå varedemãm shaêitî ahurô.

17. ýathrâ vê afshmânî sêñghânî nôit anafshmãm dêjâmâspâ hvô-gvâ hadâ vêstâ vahmêñg seraoshâ râdanghô ýê vîcinaot dâthemcâ adâthemcâ dañgrâ mañtû ashâ mazdå ahurô.

18. ýê maibyâ ýaosh ahmâi ascît vahishtâ mah'yå ishtôish vohû côishem mananghâ ãstêñg ahmâi ýê nå ãstâi daidîtâ mazdâ ashâ xshmâkem vârem xshnaoshemnô tat môi xratêush mananghascâ vîcithem.

19. ýê-môi ashât haithîm hacâ vareshaitî zarathushtrâi hyat vasnâ ferashôtemem ahmâi mîzhdem haneñtê parâhûm manê-vistâish mat vîspâish gâvâ azî tâcît môi sãs tvêm mazdâ vaêdishtô!

20. (zôt u râspî,) ushtâ ahmâi ... gaêm mananghô (2). ashem vohû ... (3). kamnamaêzãm hâitîm ýazamaide. ushtavaitîm gâthãm ashaonîm ashahe ratûm ýazamaide, ushtavaityå gâthayå hañdâtâ ýazamaide. ýenghê hâtãm ... tåscâ ýazamaide!!!